Алә сүресі
(87:0) Аса қамқор, ерекше мейірімді Алланың атымен бастаймын.
(87:1) Ұлы Раббыңның атын дәріпте.
(87:2) Ол сондай Алла; жаратып, толықтаған,
(87:3) Ол сондай Алла, шамалап оңғарған.
(87:4) Ол сондай Алла, жайылысты жаратқан.
(87:5) Сосын оны қапқара қоқымға айналдырған.
(87:6) Саған Құран оқытамыз; сонда оны ұмытпайсың.
(87:7) Бірақ, Алланың қалағаны басқа. Негізінде Ол, көрнеу, көместі біледі.
(87:8) Саған оңай болғанды қолайластырамыз.
(87:9) Пайда беретін болса, насихат ет.
(87:10) Әлде кім Алладан қорықса, үгіт алады.
(87:11) Сорлы болғандар одан бой тежейді.
(87:12) Ол, сондай зор тозаққа салынады.
(87:13) Сосын ол арада өлмейді де тірілмейді.
(87:14) Әлде кім тазарса, ол құтылады.
(87:15) Ол, Раббының атын еске алып, намаз оқыды.
(87:16) Бірақ сендер дүние тіршілігін артық көресіңдер.
(87:17) Ақырет қайырлы да, тұрақты.
(87:18) Негізінен бұл үкімдер бұрынғы нұсқаларда бар;
(87:19) Ибрахим, Мұсалардың нұсқаларында.